Nakadawat og tig-P10,000 nga cash gift ang 25 ka kwalipikadong senior citizen sa Santo Tomas, Davao del Norte, ubos sa Republic Act No. 11982 o Expanded Centenarian Act (ECA), atol sa distribusyon nga gipahigayon sa Municipal Covered Court niadtong Oktubre 20, 2026.
Gipahigayon ang maong kalihokan sa Lokal nga Panggamhanan sa Santo Tomas, ubos sa pagpangulo ni Mayor Roland S. Dejesica ug Vice Mayor Maria Luz F. Dejesica, sa pakigtambayayong sa National Commission of Senior Citizens (NCSC) Regional Office XI, Municipal Social Welfare and Development Office (MSWDO), nga gipangulohan ni Acting MSWDO Ruby Panimdim, ug sa Office of the Senior Citizens Affairs (OSCA).
Ubos sa Expanded Centenarian Act, ang mga kwalipikadong senior citizen nga moabot sa edad nga 80, 85, 90 ug 95 anyos makadawat og P10,000 nga cash gift isip pag-ila sa ilang kontribusyon sa katilingban.
Samtang, ang mga senior citizen nga moabot sa edad nga 100 anyos kwalipikadong makadawat og P100,000 nga cash gift. Pinaagi sa maong programa, gihatagan og pagpasidungog ang taas nga kinabuhi sa mga tigulang ug ang ilang bililhon nga papel sa pamilya ug komunidad.
Photo Courtesy: Santo Tomas Information Office
