Gipasidunggan si Michael Vaughn Ocio sa Lokal nga Panggamhanan sa Tagum City human sa iyang makasaysayanong pagkasungkit sa bronze medal sa kompetisyon sa Pokémon UNITE atol sa 2026 Asian Games sa Aichi-Nagoya, Japan niadtong Setyembre 27, 2026.
Gihatag ang pag-ila kang Ocio atol sa Monday Convocation nga gipahigayon sa Tagum City Hall Atrium niadtong nakalabay nga adlaw agig pagpasidungog sa iyang kalampusan nga nagdala og dungog sa siyudad sa internasyonal nga entablado.
Ang Pokémon UNITE usa ka kompetisyon sa electronic sports o esports diin mag-atubang ang mga magdudula pinaagi sa taktika, estratehiya ug koordinasyon sa team. Pinaagi sa iyang pagkadaog, napakita ni Ocio ang abilidad ug talento sa mga Pilipinong atleta sa esports sa pagpakigkompetensiya batok sa mga magdudula gikan sa nagkalainlaing nasud.
Gipadayag usab ang pahalipay kang Ocio, sa iyang pamilya ug mga nagsuporta kaniya tungod sa maong kalampusan nga naghatag og garbo sa dakbayan sa Tagum.
Photo Courtesy: Tagum City Youth and Sports Development Office
