Gipasidaan sa Department of Agriculture ang posibleng pagkab-ot sa 20 bilyon pesos nga kadaot sa sektor sa agrikultura tungod sa umaabot nga Super El Niño. Gibanabana nga 350,000 ka ektarya sa kaumahan ang mahimong maapektuhan sa grabeng kainit ug kakulang sa ulan.
Matod ni Agriculture Secretary Francisco Tiu Laurel Jr., posibleng maapektuhan ang 2.8 milyon hangtod 4.8 milyon ka mag-uuma ug mangingisda sa tibuok nasud.
Gilauman usab nga mokunhod ang produksyon sa bugas og hangtod 1 milyon ka tonelada, hinungdan nga nag-andam ang gobyerno sa dugang suplay aron malikayan ang kakulang sa pagkaon.
Tungod niini, giawhag ni Senador Francis Pangilinan ang gobyerno nga ideklarar ang nasudnong estado sa kalamidad aron mapalapdan ang tabang sa mga apektadong mag-uuma ug mangingisda.
Photo courtesy: Philippine Information Agency
