Pinansyal nga problema ang gitan-aw nga posibleng motibo sa paghunos sa kinabuhi sa usa ka security guard gamit ang iyang issued firearm sa usa ka outpost sa Dipolog City Bus Terminal didto sa Barangay Sta. Isabel, Dipolog City, Oktubre 22, 2026.
Matud pa ni PMAJ Evelyn Porras, Deputy Chief of Police sa Dipolog City Police Station, base sa inisyal nga imbestigasyon, gibutyag sa mga kauban sa trabaho nga panahon na unta sa pag-turnover sa armas ngadto sa mopuli sa iyang duty, apan midumili pa kini ug miingon nga unya na lang. Pipila ka gutlo human niini, nadungog ang buto sa armas ug nakit-an na ang security guard nga wala nay kinabuhi.
Dugang pa ni Porras, ang maong security guard adunay upat ka anak. Tungod niini, nagpahimangno ang Dipolog City Police Station sa publiko nga ang paghunos sa kaugalingong kinabuhi dili solusyon sa mga problema. Giawhag usab ang katawhan nga nag-atubang og bug-at nga problema nga mangayo og tambag o tabang ug makig-istorya sa pamilya, higala o mga tawo nga ilang kasaligan.
