Sobra na sa 300,000 ka visa ang gibawi sa administrasyon ni US President Donald Trump sukad sa pagsugod sa iyang ikaduhang termino niadtong Enero 2025, samtang gipakusog sa pederal nga gobyerno sa Estados Unidos ang kampanya batok sa illegal immigration.
Matod sa US State Department, misaka ang gidaghanon sa mga gibawing visa sa milabay nga mga semana, gikan sa kapin sa 175,000 niadtong Agosto 10. Sumala ni State Department spokesperson Tommy Pigott, pinakapaspas kini nga pagpatuman sa visa revocation sa kasaysayan sa Estados Unidos.
Gipasabot ni Pigott nga hugot ang baroganan sa administrasyon batok sa mga langyaw nga molapas sa balaod, mohimo og pagpanglimbong o mahimong hulga sa nasudnong seguridad.
Apan gikabalak-an sa mga tigpanalipod sa tawhanong katungod ang pipila ka lakang, lakip ang pagbawi sa visa sa mga langyaw nga miapil sa mga protesta pabor sa Palestine ug nagpahayag sa ilang opinyon sa social media.
Bisan pa nga nakapunting ang kampanya ni Trump sa pagpugong sa illegal immigration, gipalapdan usab sa iyang administrasyon ang mga lakang nga nakapalisod sa mga langyaw sa pagsulod ug pagpabilin sa Estados Unidos pinaagi sa legal nga paagi.
Photo courtesy: Wikipedia
