Naluwas ang daghang orangutan nga nameligro nang mapuo sa miaging mga semana gikan sa nagpadayon nga sunog sa kalasangan sa Indonesia nga hinungdan sa makahilong aso ug polusyon sa hangin sa rehiyon.
Sumala sa mga grupo nga nagpanalipod sa kinaiyahan, mikabat sa 51 ka orangutan ang gipabakwit sa probinsya sa West Kalimantan gikan Agosto 6 hangtod Oktubre 19. Samtang, base sa datos sa Indonesia Forestry Ministry, posibleng moabot sa 96 ang mga orangutan nga naluwas sa Kalimantan sa milabay nga mga bulan.
Gipahibalo usab sa transport ministry sa Indonesia nga kapin sa 2,400 ka biyahe sa eroplano sa nasud ang naapektuhan sa aso sukad sa tunga-tunga sa Agosto tungod sa pagkunhod sa visibility sa mga tugpahanan.
Matod sa eksperto sa atmospheric science nga si Wang Jingyu, ang grabeng El Niño nga nakaapekto sa Southeast Asia posibleng nakapakunhod sa pag-ulan tungod sa mas bugnaw nga temperatura sa dagat, hinungdan nga mas lisod mapalong ang mga sunog.
Photo courtesy: People.com
