Nasakmit sa kapulisan ang mobalor sa ₱3,667,000 nga smuggled nga sigarilyo atol sa checkpoint operation sa Barangay Poblacion, Salug, Zamboanga del Norte, niadtong nakalabay nga adlaw.
Sumala pa nga atol sa pag-inspeksiyon sa usa ka sakyanan, nadiskobrehan sa mga operatiba ang mga kahon sa gituohang smuggled nga sigarilyo. Usa ka 21-anyos nga lalaki, residente sa Barangay Poblacion, Kumalarang, Zamboanga del Sur, ang gidakop may kalabotan sa maong insidente.
Ang maong kontrabando gilangkuban sa 950 ka ream sa Berlin Color Red cigarettes nga gibana-banang mobalor sa ₱3,667,000, base sa standard price index sa Bureau of Customs.
Gipahigayon ang maong operasyon sa Salug Municipal Police Station kauban ang mga personahe sa 2nd Zamboanga del Norte Provincial Mobile Force Company nga mi-resulta sa pagka sakmit sa mga kontrabando ug pagkasikop sa suspetsado.
Ang dinakpan, sakyanan ug mga gituohang smuggled nga sigarilyo gidala ngadto sa Salug MPS alang sa dokumentasyon, imbestigasyon ug dugang nga legal nga aksiyon.
Samtang gipahayag sa Police Regional Office 9, ubos sa pagpangulo ni Police Brigadier General Elmer E. Ragay, nga magpadayon ang ilang kampanya batok sa smuggling, ilegal nga patigayon ug uban pang matang sa kriminalidad sa rehiyon.
Photo courtesy: Zampen
