Pito ka pusil ang boluntaryong gitugyan o gideposito sa nagkadaiyang estasyon sa pulisya sa South Cotabato niadtong Oktubre 19, 2026, isip suporta sa kampanya batok sa mga armas nga walay hustong pagtugot.
Samtang, nadakpan sa Polomolok Municipal Police Station ang usa ka wanted person nga giatubang ang kaso nga Acts of Lasciviousness o malaw-ay nga buhat, ubos sa LOI Manhunt Charlie.
Duha usab ka suspek sa ilegal nga droga ang nadakpan sa managlahing buy-bust operation nga gipahigayon sa Koronadal City Police Station ug Polomolok Municipal Police Station, diin narekober ang gituohang shabu.
Sa laing bahin, nagpahigayon og inspeksiyon ang Tupi Municipal Police Station, kauban ang lokal nga pangagamhanan sa Tupi, batok sa mga sigarilyong gituohang gipalusot. Miresulta kini sa pagtugyan sa pipila ka produkto sa sigarilyo nga walay selyo sa buhis ug mga pasidaan sa kadaot niini sa panglawas.
Matod sa South Cotabato Police Provincial Office, kabahin kini sa ilang padayong paningkamot sa pagpakigbatok sa ilegal nga droga, mga pusil nga walay hustong pagtugot, mga wanted person ug uban pang hulga sa kalinaw ug kaluwasan sa publiko.
Photo courtesy: SCPPO
