Narekober ang motor nga giingong gikawat samtang giparking sa Purok 2, TCES, Barangay Poblacion, Tubod, Lanao del Norte, sa may alas 6:30 sa gabii niadtong Oktubre 18, 2026 human sa paspas nga aksyon sa kapulisan sa pagpanguna sa Tubod Municipal Police Station (MPS), ubos sa Lanao del Norte Police Provincial Office (LDN PPO).
Subay sa report, ang nabawing motorsiklo usa ka pula nga Honda Click 125 nga adunay plate number 194KYX nga giingong giparking kini sa tag-iya daplin sa dalan sa Purok 2, TCES, Barangay Poblacion, Tubod, Lanao del Norte, mga alas 6:30 sa gabii niadtong Oktubre 18, samtang nanuroy sa plaza apan sa may alas 7:30 sa gabii, atol sa brownout, iyang nadiskobrehan nga wala na ang iyang motorsiklo.
Tungod sa kabalaka sa tag-iya, nidangop kini sa kapulisan ug gilayon nilihok ang mga sakop sa Tubod MPS aron sa pagpahigayon og follow-up operations.
Sa dugang pagsusi, sa may alas 5:30 sa hapon niadtong Oktubre 19, nabawi ang motorsiklo sa Purok 4, TCES, Barangay Poblacion, Tubod, pinaagi sa tabang sa inahan sa gidudahang suspek.
Sa pagkakaron, anaa sa kustodiya sa Tubod MPS ang motor alang sa hustong dokumentasyon ug disposisyon, samtang giandam na ang angay nga reklamo sa suspek nga karon nagpabiling at large.
Photo Courtesy: PNP Lanao del Norte
