Nasakmit sa kapulisan ang 100 ka master cases sa nagkalain-laing klase sa ilegal nga sigarilyo nga adunay gibanabanang kantidad nga lima ka milyon, pito ka gatos ug katloan ka libo ka pesos o ₱5,730,000 atol sa usa ka operasyon batok sa pagpamaligya ug pagpasulod sa smuggled cigarettes sa Barangay Poblacion, Malangas, Zamboanga Sibugay, pasado alas-12:55 sa kaadlawon niadtong Oktubre 21, 2026.
Usa ka hamtong nga lalaki ang nadakpan sa maong operasyon nga gipangulohan sa Provincial Intelligence Unit o PIU sa Zamboanga Sibugay Police Provincial Office, kauban ang ZSMARPSTA, 903rd Maneuver Company sa Regional Mobile Force Battalion 9, RA Sibugay RID 9, ZSB 1st Provincial Mobile Force Company ug Malangas Municipal Police Station, sa koordinasyon sa Bureau of Customs.
Ang mga nakumpiskang sigarilyo naglangkob sa 31 ka master cases sa Venus Filter, 29 ka master cases sa U2 Full Flavour, 30 ka master cases sa Canon Menthol, walo ka master cases sa San Diego Lights ug duha ka master cases sa Astro Red cigarettes.
Ang nadakpang lalaki ug ang tanang nakumpiskang sigarilyo gidala sa Malangas Municipal Police Station alang sa temporaryong kustodiya, sa dili pa itugyan ngadto sa Bureau of Customs alang sa hustong disposisyon. Matod sa kapulisan, ang operasyon kabahin sa ilang padayong paningkamot batok sa smuggling ug ilegal nga pag-apod-apod sa mga sigarilyo sa probinsiya sa Zamboanga Sibugay.
