Patay ang usa ka lalaki, samtang samaran ang usa ka babaye human sila gipamusil sa usa ka haya didto sa Purok 3, Barangay Lampayan, Matalam, Cotabato, pasado alas-8:50 sa gabii niadtong Oktubre 20, 2026.
Giila sa kapulisan ang namatay nga si R., anaa sa gibana banang trentahon ang pangidaron, samtang ang samdan mao si alyas B 43 anyos, pulos mga residente sa maong barangay.
Base sa inisyal nga imbestigasyon sa Matalam Municipal Police Station, naglingkod ang duha ka biktima sa gawas sa usa ka balay uban sa mga bisita sa usa ka haya, dihang kalit nga miduol gikan sa ilang likod nga bahin ang suspek nga giila sa alyas “Calan,” nga nagsul-ob og itom nga dyaket ug karsones, ug gipusil sila sa makadaghang higayon sa wala pa mokalagiw.
Gilayong nadala pa sa tambalanan ang mga biktima nga lalaki, apan gideklarang wala na kini gininhawa pag-abot tungod sa mga samad pinusilan sa nagkadaiyang parte sa iyang kalawasan. Samtang ang naangol nga babaye, nakaangkon samad pinusilan sa tuo nga paa.
Narekober sa mga otoridad sa dapit sa nahitaboan ang pito ka basyo sa bala, nga gituohang gikan sa kalibre .45 nga armas, og ipailalom kini sa forensic examination aron makatabang sa imbestigasyon.
Padayon ang pagsusi sa Matalam Police Station ubos sa pagpanguna ni Chief of Police LTCOL Marvin C. Hugos aron matino ang motibo sa pagpamusil ug madakpan ang suspek.Nanawagan ang kapulisan sa katawhan nga adunay impormasyon nga motawag o moduol sa pinakaduol nga police station.
Photo courtesy: Matalam Municipal Police Station
