Gipasidunggan ang mga mag-uuma ug ilang pamilya atol sa Farm Family Day 2026 nga gipahigayon sa Municipal Grounds sa Pigcawayan, Cotabato niadtong Oktubre 19, isip pag-ila sa ilang kontribusyon sa sektor sa agrikultura. Lakip sa mga kalihokan ang cultural dance ug product display contests, diin gipakita ang nagkalain-laing abot sa uma sama sa pinakataas nga sitaw, pinakabug-at nga kalabasa, kinadak-ang saging ug uban pang talagsaong produkto.
Gihatagan usab og pasidungog ang mga talagsaong mag-uuma, community gardens ug mga nakadaog sa nagkalain-laing kompetisyon sa agrikultura sa probinsya, rehiyon ug nasudnong lebel. Ang kalihokan gitambongan ni Elmer N. Suriaga, OIC Provincial Fishery Officer, isip representante sa direktor sa Bureau of Fisheries and Aquatic Resources (BFAR). Kabahin kini sa pagsaulog sa ika-73 nga founding anniversary sa Pigcawayan ug sa ika-5 Padayaw Festival 2026.
Photo courtesy: Pigcawayan ang Banwa Ta
