Nadakpan ang driver ug pasahero sa pagpalusot saa P240K nga ismagol nga sigarilyo pinaagi sa pagpanguna sa 1005th Maneuver Company, kauban ang intelligence operatives sa BNHQ, RMFB 10, Pantar Municipal Police Station (MPS), 1st Provincial Mobile Force Company (PMFC) sa Lanao del Norte Police Provincial Office (LDN PPO), ug RID 10, atol sa checkpoint operation sa may alas 1:05 sa hapon niadtong Oktubre 19, 2026 sa Pantar RBCP, Barangay Campong, Pantar, Lanao del Norte.
Giila ang driver nga si alyas “Drew”, 39 anyos, lalaki ug ang pasahero nga si alays “Dido” 22 anyos, lalaki, ug mga residente sa Agusan del Norte. Subay sa report, giingong gipahunong sa kapulisan ang usa ka metallic blue nga Toyota Vios nga nagbiyahe gikan sa Marawi City padulong sa Iligan City.
Atol sa inspeksiyon, namatikdan sa mga operatiba ang 300 ka ream sa sigarilyo nga nagkantidad sa ₱240,000 nga walay saktong dokumento nga napakita ang drayber.
Sa pagkakaron, gidala ang drayber ug pasahero sa Pantar MPS alang sa dokumentasyon, samtang ang sakyanan ug nakumpiska nga mga sigarilyo itugyan sa Bureau of Customs sa Iligan City alang sa hustong disposisyon.
Photo Courtesy: PNP Lanao del Norte
