Giaprubahan sa Cagayan de Oro City Council ang resolusyon nga musagop sa Annual Investment Program kon AIP alang sa fiscal year 2027 nga maglangkob sa prayoridad nga mga programa, proyekto ug aktibidad kon PPA sa mga departamento sa syudad.
Pinaagi sa resolution no. 2026-426, gisagop sa syudad ang Annual Investment Program nga mukantidad sa P20.014 billion apan duha ka Konsehal ang nag-abstain sa pagboto nga silang Konsehal Yvy Emano ug Konsehal Aga Suan.
Pagpasabot ni Konsehal Emano sa iyahang abstention nga daghan pa silang pangutana kabahin sa Annual Investment Program apan wala kini natubag og tarong sa hingtungdang mga opisyal.
Pangutana sab sa Konsehal kung paunsa mapondohan ang AIP nga anaa sa kapin P20 billion samtang ang Executive Budget nga bag-uhay lang naaprubahan, anaa lamang sa kapin P9 billion.
Kahinumduman nga usa sab si Konsehal Emano sa ning supak sa budget hearing kaniadtong Oktubre kinse tungod sa dinalian nga pag-aprubar niini.
Photo courtesy: CdeO City Council
