Gipalig-on sa Department of Education (DepEd) Bukidnon ang mga lakang aron mamenosan ang epekto sa grabeng kainit sa panahon sa mga estudyante sa lalawigan, ilabina sa posibleng hulga sa El Niño.
Sa usa ka esklusibong pakighinabi sa Juander Radyo Malaybalay, gipadayag ni DepEd Bukidnon Information Officer Said Macabago nga gilatid na sa Schools Division Superintendent atol sa ilang Management Committee Meeting sa Quezon Civic Arena ang mga dapat buhaton sa mga tunghaan.
Lakip na niini ang pag-ayo sa mga bentilador, pag-abli sa mga bintana aron makasulod ang hangin, ug ang pag-prayoridad sa Maintenance and Other Operating Expenses (MOOE) pondo alang sa pagpalit ug pag-ayo sa mga electric fan, dungan sa pagtugot sa pagsul-ob og mas hayahay nga sanina sama sa sando kun kinahanglanon.
Sa pikas bahin, gipadayag ni Macabago nga sa kasamtangan wala pa’y eskwelahan sa Bukidnon nga nagpatuman sa pagsul-ob og sando o nagsuspinde sa klase tungod sa kainit. Gipasabot usab sa opisyal nga ang mga alkalde sa matag lungsod ug siyudad ang adunay opisyal nga awtoridad sa pagdeklarar og suspensiyon sa klase kun may kalabotan kini sa sitwasyon sa panahon.
Photo courtesy:DepEd Bukidnon
