Dako ang kalipay sa mga mag-uuma gikan sa tanang barangay sa Dakbayan sa Malaybalay human sila nakadawat og libreng soil analysis pinaagi sa ₱43-milyon nga Mobile Soil Laboratory (MSL) sa Department of Agriculture–Bureau of Soils and Water Management (DA-BSWM) Region X. Ang maong kalihokan, nga gipahigayon niadtong Oktubre 6 hangtod 9 sa City Hall, nagtumong sa pagpaduol sa modernong serbisyo sa pagsusi sa yuta aron matabangan ang mga mag-uuma nga masabtan ang kahimtang sa ilang umahan ug mapalambo ang produksyon sa humay, mais, ug high-value commercial crops.
Mikabat sa 74 ka sampol sa yuta ang gipailawom sa chemical, physical, ug biological analysis pinaagi sa hiniusang paningkamot sa BSWM Region X MSL Team ug sa City Agriculture Office (CAgO) nga gipangulohan sa ilang Integrated Agricultural Laboratory Section. Gawas sa pagsusi sa yuta, gipahigayon usab niadtong Oktubre 7 ang usa ka pagbansay bahin sa Proper Soil Sampling/Collection and Qualitative Soil Analysis sa Farmers Training Center sa Barangay Casisang, nga gitambongan sa 36 ka partisipante gikan sa Malaybalay ug Cabanglasan.
Kini nga inisyatiba ubos sa Soil Health Program sa DA-BSWM nagpakita sa padayong pagtambayayong tali sa nasyonal ug lokal nga gobyerno aron mapalig-on ang siyentipikanhong pamaagi sa pagpanguma. Pinaagi sa husto nga datos gikan sa soil testing, gilauman nga mas mahibal-an sa mga mag-uuma ang hustong paggamit sa abono ug pagdumala sa yuta aron mopataas ang ilang abot ug masiguro ang malungtarong agrikultura sa tibuok dakbayan.
Photo courtesy: LGU Malaybalay City
