Pormal nang giaprubahan sa Sangguniang Panlungsod sa Dakbayan sa Malaybalay sa ikatulong pagbasa ang ordinansa alang sa pag-isyu sa special permits ug franchise para sa mga drayber sa Bao-Bao ug Tricab. Pinaagi sa inisyatiba ni City Councilor Atty. Rendon P. Sangalang ug sa suporta sa tibuok konseho, nagtumong kini sa paghatag og legal nga katungod sa mga drayber aron makatrabaho nga hapsay ug walay kahadlok nga madakpan sulod sa siyudad.
Ubos sa maong regulasyon, gitakda ang bayranan nga ₱1,500 alang sa prangkisa nga balido sulod sa tulo (3) ka tuig, ug ₱500 alang sa special permit nga i-renew matag tuig.
Aron malikayan ang paghuot sa trapiko, aduna usay gipatuman nga color coding ug mga klarong rota diin gidili ang pag-agi o pagpamasahero sa national highway ug sa mga rota sa motorela. Ang magdumili o molapas sa balaod mag-atubang og multa nga ₱500, community service, suspension, o pagbawi sa ilang permit ug franchise.
Gisiguro sa lokal nga gobyerno nga ang gitudlong mga rota dili makabalda sa panginabuhi sa mga drayber sa motorela ug multicab, ug gipaabot na lamang ang opisyal nga pagpirma ni City Mayor Jay Warren Pabillaran aron kini bug-os nang ipatuman.
Photo courtesy: Atty. Rendon “Jo” P. Sangalang
