Opisyal nang giturn-over sa Department of Agrarian Reform o DAR ang ₱22 milyones nga farm-to-market road nga nagkonektar sa Fundador Street ngadto sa Barangay Santo Tomas sa lungsod sa Mutia, Zamboanga del Norte. Ang maong proyekto gilaom nga makabenepisyo sa 4,832 ka residente human sa daghang katuigan nga pag-antos sa lapokon ug danlog nga mga dalan.
Gipangulohan ni DAR Zamboanga del Norte Provincial Agrarian Reform Program Officer II Daisy Dell Suan Digamon, uban ni Undersecretary for Support Services Josef Angelo S. Martires ug Regional Director Atty. Ramon E. Madroñal Jr., ang maong seremonya.
Tumong sa sementadong dalan nga mapalambo ang transportasyon ug konektibidad sa mga residente, agrarian reform beneficiaries ug mga mag-uuma. Gilaom usab nga mas sayon na ang pagdala sa mga importanteng serbisyo ug pagdala usab sa mga produkto sa umahan, ilabi na panahon sa ting-ulan.
Sumala ni Usec. Martires, ang farm-to-market road nga gihangyo sa usa ka organisasyon sa mga benepisyaryo sa repormang agraryo dili lang alang sa ilang mga miyembro kondili para sa tibuok komunidad ug sa pagpalambo sa ilang panginabuhian.
Nagpahayag usab og kalipay ug pasalamat si Leliosa Torres, 65 anyos, residente ug agrarian reform beneficiary, kay matud pa mahimo na silang makaagi sa sementadong dalan imbes sa lapokon ug danlog nga agianan nga makapalisod sa pagbiyahe panahon sa ting-ulan.
Misalmot usab sa turnover ceremony si Mutia Mayor Engr. Lorrymir S. Adasa, La Libertad Mayor Ricky R. Cuenca, 1st District Board Member Jimmy Patrick Israel B. Chan, ug ubang opisyal sa DAR, lokal nga kagamhanan, barangay ug mga benepisyaryo. Pinaagi sa maong proyekto, padayon nga gipalig-on sa DAR ang konektibidad ug kalamboan sa mga komunidad.
𝐏𝐡𝐨𝐭𝐨 𝐂𝐨𝐮𝐫𝐭𝐞𝐬𝐲: 𝐃𝐀𝐑, 𝐙𝐚𝐦𝐛𝐨𝐚𝐧𝐠𝐚 𝐝𝐞𝐥 𝐧𝐨𝐫𝐭𝐞
