Usa ka propesyonal nga puppeteer (tig-dula og mga puppet) gikan sa North Carolina, U.S.A., ang nakasakmit sa titulo sa Guinness World Record alang sa kinadak-ang koleksyon sa mga finger puppet (mga puppet nga isul-ob sa tudlo), human siya midugang og dul-an sa 1,000 kabuok sa iyang koleksyon.
Si Cheralyn Lambeth, gikan sa Charlotte, aduna nay 3,451 ka finger puppet usa ka kalamposan nga nagtugot kaniya sa pagbawi sa opisyal nga titulo alang sa “kinadak-ang koleksyon sa mga finger puppet” niadtong Enero 18.
Sulod sa pipila ka tuig, si Lambeth ug ang iyang kaubang kolektor nga si Salacnib “Sonny” Molina, gikan sa Illinois, nag-ilogay alang niini nga rekord.
Una nga nakuha ni Molina ang titulo niadtong 2021 nga adunay 497 ka puppet. Paglabay sa usa ka tuig, nalabwan siya ni Lambeth human niabot ang iyang koleksyon sa kinatibuk-ang 563. Nabawi ni Molina ang pagpanguna niadtong 2023, dihang ang iyang koleksyon miabot sa 1,517.
Apan, nagpadayon ang pagdaghan sa koleksyon ni Lambeth, ug nabawi niya ang rekord niadtong 2025 nga adunay 2,540 ka piraso. Pipila lang ka bulan ang milabay, nalabwan na usab siya ni Molina, kinsa miabot sa 2,978. Wala kini makapaluya kang Lambeth; nagpadayon siya sa paghimo ug pagpangolekta. Sa pagkakaron, anaa na sa 3,451 ka finger puppet ang iyang koleksyon.
Nagsugod ang iyang koleksyon atol sa pandemya, dihang nagpabilin siya sa balay ug naghimo og yano nga mga hand puppet ug finger puppet usa ka proyekto nga mahimo usab sulayan sa mga ginikanan ug mga bata.
Sa paglabay sa panahon, namatikdan niya nga paspas nga nagkadaghan ang iyang mga hinimo ug nakaamgo siya nga mahimo diay siyang mokwalipikar alang sa usa ka world record. Gawas sa mga finger puppet nga siya mismo ang naghimo gamit ang felt ug uban pang mga materyales, mokuha usab si Lambeth gikan sa mga flea market (merkado sa mga segunda-mano), mga tindahan sa mga karaang butang, mga higala, ug uban pang mga kolektor gikan sa nagkalain-laing nasod.
Dugay na nga nalambigit si Lambeth sa natad sa puppetry. Lakip sa iyang mga nangaging proyekto mao ang paghimo og mga puppet nga binuhat alang sa The Muppets Christmas Carol, ang serye sa telebisyon nga Dinosaurs!, ug usa ka produksyon sa Europa sa musikal nga Avenue Q.
Bisan pa sa pagkab-ot og bag-ong rekord, nag-ingon siya nga wala siyay plano nga mohunong sa paghimo o pagpangolekta og mga finger puppet.
Photo Courtesy: Guinness World Records
