Kung walay kwarta plete, unsa man imong buhaton? Mangutang? Mangayo og tabang? Pero ang usa ka atleta sa Australia, mas grabe ang gihimong diskarte—misulod siya sa kahon sama sa kargamentong hayop aron makapauli lang.
Niadtong 1964, si Reg Spiers, 22 anyos, na-stranded sa England human mapakyas ang iyang pangandoy nga makaapil sa Tokyo Olympics. Wala na siyay kwarta plete pauli, pero hapit na ang birthday sa iyang anak nga babaye. Mao nga misulod siya sa kahon nga adunay de-latang pagkaon, habol, flashlight, tubig ug botelya nga iyang gamiton sa pag-ihi.
Human sa 63 ka oras nga biyahe, nakaabot siya sa Perth, Australia. Gikan didto, nag-hitchhike siya paingon sa Adelaide ug nakaabot sa ilang balay sa tukmang panahon sa birthday sa iyang anak.
Kini nga istorya sa usa ka amahan nagpakita kung unsa ka lawom ang gugma sa usa ka ginikanan. Bisan pa sa kalisod ug risgo nga iyang giatubang, makita nato ang iyang tinguha nga makauban ang iyang anak sa usa ka espesyal nga adlaw.
Apan nagpahinumdom usab kini kanato nga ang gugma dili lamang masukod sa mga sakripisyo nga atong buhaton, kondili sa kaalam ug responsibilidad sa atong mga desisyon. Ang tinguha nga makahatag og kalipay sa pamilya bililhon, apan importante gihapon nga dili ibutang sa peligro ang atong kinabuhi ug kaluwasan.
Sa katapusan, ang tinuod nga gugma sa pamilya dili lamang makita sa kalayo nga atong biyahion o sa risgo nga atong atubangon, kondili sa atong paningkamot nga magpabiling luwas, responsable, ug anaa alang sa mga tawo nga labing importante sa atong kinabuhi.
Photo courtesy: Daily Mail
