Nikabat sa 153 ka tawo ang namatay sa nahitabong drone strike sa usa ka merkado sa Abyei, Africa—usa ka rehiyon sa utlanan nga gi-ilogan sa Sudan ug South Sudan. Miigo ang drone sa duol nga bodega sa gasolina nga miresulta sa dakong sunog sa Amiet Market. Gitudlo sa administrasyon sa Abyei ang militar sa Sudan sa pag-atake, samtang gipasabot usab sa usa ka opisyal sa militar sa Sudan nga ang ilang target ang mga miyembro sa Rapid Support Forces (RSF) ug mga nalambigit sa fuel smuggling, ug wala silay intensyon nga maigo ang mga sibilyan.
Dugang pa sa mga awtoridad, labing menos 20 ka inosenteng sibilyan ang naangol—diin ang pipila anaa sa kritikal nga kondisyon—ug gidala sa Ameth Bek Hospital alang sa pagpatambal. Gibasol sa South Sudan Foreign Ministry ang militar sa Sudan tungod sa pag-atake sa mga lokasyon nga duol sa merkado nga miresulta sa pagpamusil ug pagkadamyos sa mga imprastraktura.
Tungod sa insidente, gipatawag sa South Sudan ang ambassador sa Sudan aron ipahayag ang ilang grabeng pagprotesta. Giawhag usab nila ang Sudan nga likayan ang mga lihok nga makabutang sa peligro sa kinabuhi ug propedad sa mga sibilyan, ug nanawagan nga sulbaron ang mga bangi sa Abyei pinaagi sa diplomatikong paagi ug maayong pag-istoryahanay.
Photo courtesy: Daily Nation
