Nagpabiling lig-on ang relasyon tali sa Pilipinas ug China, bisan pa sa pagbinayloay og hait nga mga pulong tali sa Embahador sa China sa Pilipinas ug sa pipila ka mga magbabalaod.
Gikumpirma kini ni Palace Press Officer Atty. Claire Castro, kinsa nag-ingon nga tumong ni Presidente Ferdinand Marcos Jr. nga palamboon ang relasyon sa gobyerno uban sa China, bisan pa sa mga mahagitong pahayag gikan sa Embahador sa China.
Samtang, ang Embahada sa China sa Manila nagpahayag nga ang relasyon tali sa duha ka nasod anaa karon sa usa ka “hilabihan ka sensitibo nga yugto.”
Ang Embahada sa China bukas usab sa posibilidad sa usa ka personal nga panagtagbo tali ni Presidente Marcos ug Embahador Jing Quan aron hisgotan kung unsaon pagpugong ang pipila ka mga indibidwal sa pagduso sa relasyon sa duha ka nasod ngadto sa usa ka “delikado nga sitwasyon.”
Ang Malacañang mipahibalo na kaniadto nga ang Presidente nagtinguha nga makig-alayon sa embahador sa China pinaagi sa diplomatikong mga pamaagi, aron masiguro nga dili mameligro ang relasyon tali sa duha ka nasod.
Dugang pa ni Castro, ang relasyon sa Pilipinas ug China bahin sa pamatigayon ug pamuhunan lahi ra sa mga isyu nga may kalabotan sa pagpanalipod sa teritoryo ug mga interes sa nasod diha sa West Philippine Sea.
Photo Courtesy:Global Times
