Mitubo og 4.5 porsiyento ang ekonomiya sa China sa ikatulong kwarter sa tuig, gikan sa Hulyo hangtod Septyembre. Nakapalig-on sa ekonomiya ang pag-uswag sa artificial intelligence (AI) ug pagtaas sa eksport, bisan pa nga ubos kini sa lima ka porsiyentong pagtubo nga natala sa unang kwarter.
Misaka og 14.3 porsiyento ang halin sa mga high-tech nga produkto, samtang mitubo og kapin sa 29 porsiyento ang produksiyon sa mga baterya ug industriyal nga robot. Matod sa mga eksperto, dako ang natabang sa industriya sa teknolohiya ug eksport sa pagpalig-on sa ekonomiya sa nasod.
Apan, nagpadayon ang pagkunhod sa sektor sa kabtangan, diin miubos og kapin sa 20 porsiyento ang pamuhunan sa unang siyam ka bulan. Ang hinay nga pagtubo sa sweldo, kawalay trabaho sa mga batan-on ug kawalay kasigurohan sa patigayon nakapamenos usab sa paggasto sa mga konsumidor.
Aron mapalig-on ang ekonomiya, nagpatuman ang gobyerno sa China og mga lakang sama sa pagpaubos sa interes sa utang ug paghatag og subsidiya sa mga mamalitay og kabtangan.
Bisan pa niini, nagpadayon ang mga hagit sa patigayon ug mga kabalaka bahin sa dako nga pamuhunan sa AI ug kung makahatag ba kini sa gipaabot nga ganansiya.
Photo Courtesy: South China Morning Post
