Patay ang 58 ka tawo ug kapin sa 200 ang nasamdan human giatake sa Houthi rebels ang usa ka training camp sa mga pwersang pangseguridad sa probinsya sa Shabwa, Yemen, niadtong Lunes. Kini ang gipadayag ni Shabwa Governor Awad al-Wazir. Gawas sa mga namatay ug nasamdan, 14 pa ka tawo ang gikataho nga nawagtang human sa pagpamomba sa Al-Alam camp.
Matod pa nga tulo ka ballistic missile ang gilunsad sa mga Houthi atol sa pagbansay sa mga pwersang pangseguridad. Giangkon usab sa tigpamaba sa militar sa Houthi nga si Yahya Saree nga ang kampo ilang target.
Misamot ang panagbangi tali sa Houthi rebels ug sa gobyernong giila sa internasyonal nga komunidad ug gisuportahan sa koalisyon nga gipangulohan sa Saudi Arabia. Nagsugod usab ang mga pwersa sa gobyerno og kampanya aron mabawi ang mga lugar nga kontrolado sa Houthi.
Dugay nang nag-atubang og grabeng krisis sa katawhan ang Yemen tungod sa gubat nga nagsugod niadto pang tuig 2014.
Photo courtesy: Reuters
