Gilauman sa 20 ka ekonomista nga mosaka pag-usab ang interest rates sa Bangko Sentral ng Pilipinas (BSP) atol sa Monetary Board meeting sa Oktubre 22, tungod sa padayong taas nga inflation ug kahuyang sa piso batok sa dolyar.
Base sa survey, sa 18 ka ekonomista ang nagpaabot og 0.25 percentage point nga pagsaka, samtang duha ang nagtagna og mas dako nga 0.50 percentage point nga pagsaka. Sa pagkakaron, anaa sa 5 porsyento ang benchmark interest rate sa BSP.
Misaka na og kinatibuk-ang 0.75 percentage point ang interest rates sukad Abril, taliwala sa pagsaka sa presyo sa lana sa world market tungod sa gubat sa Middle East. Niadtong Septiyembre, miabot sa 7.2 porsyento ang inflation, ang pinakataas sulod sa tulo ka tuig, tungod sa mahal nga lana ug problema sa suplay sa pagkaon nga nalambigit sa kusog nga habagatang ulan. Samtang, mitubo lamang og 2.6 porsyento ang ekonomiya sa unang unom ka bulan sa tuig.
Sumala sa mga ekonomista, ang pagsaka sa interest rates mahimong makatabang sa pagpugong sa inflation ug pagpalig-on sa piso, apan mahimo usab kini nga makapamahal sa mga utang ug makapahinay sa paggasto ug pagpamuhunan sa mga pamilya ug negosyo.
Dugang nga kabalaka ang pagkahuyang sa piso nga milapas sa ₱63 kada dolyar. Gipasidaan usab nga posibleng magpadayon ang pagsaka sa interest rates hangtod sa unang katunga sa 2027, depende sa lihok sa inflation, presyo sa lana, ug exchange rate.
