Naghiusa ang Philippine National Police o PNP, Department of Social Welfare and Development of DSWD ug Department of Education o DepEd atol sa gipahigayong seminar ug workshop nga gitawag og Understanding, Identification, and Response to Nihilistic Violent Extremism (NVE) Among Minors didto sa sa Plenary Hall sa Zamboanga del Norte Convention and Exhibition Center, Barangay Estaka, Dipolog City, Oktubre 21, 2026.
Sa welcome remarks ni PMAJ Benjamin Napigquit, Acting Chief PCADU sa Zamboanga del norte police provincial office o ZNPPO gipadayag niini ang kamahinungdanon sa maong kalihokan sa pagpalapad sa pagsabot ug kahibalo bahin sa Nihilistic Violent Extremism, ilabina sa pag-ila ug hustong pagtubag sa mga posibleng timailhan niini sa mga menor de edad.
Samtang sa mensahe ni Ms. Hannah Lou G. Mandantes, Acting Provincial Social Welfare and Development Officer nga nag representar ni governor Darel Dexter T. Uy, gipasiugda niini ang mahinungdanong papel sa mga ginikanan sa paggiya, pagdisiplina ug pagmonitor sa ilang mga anak. Iyang gipaambit usab ang iyang kasinatian isip usa ka inahan ug social worker, gihatagan ni Mandantes og gibug-aton ang responsableng pagdumala sa paggamit sa cellphone sa mga bata.
Gipasabot nga importante ang aktibong paggiya ug pagmonitor sa mga ginikanan aron malikayan ang negatibong impluwensiya sa internet ug mapanalipdan ang mga kabataan batok sa mga risgo nga mahimong makaapekto kanila.
Gipasiugda usab ni PLTCOL Ricardo C. Banes Jr., Deputy Provincial Director for Administration sa Zamboanga del norte police provincial office o ZNPPO nga ang pagpakigbatok sa Nihilistic Violent Extremism nagkinahanglan og panaghiusa ug hiniusang paningkamot sa mga ahensiya sa gobyerno, mga tulunghaan ug mga ginikanan.
Pinaagi sa maong seminar ug workshop, gitinguha nga mapalig-on ang kahibalo ug koordinasyon sa mga hingtungdang sektor aron mapanalipdan ang mga kabataan batok sa mga impluwensiyang mahimong mosangpot sa dili maayong pamatasan.
