Nadakpan sa buy-bust operation ang usa ka 25 anyos nga construction worker ug nasakmit ang gituohang shabu nga nagkantidad og kapin 26 mil pesos sa Barangay San Isidro, Koronadal City, pasado alas dos sa hapon niadtong nakalabay nga adlaw.
Giila ang suspek sa alyas “Boying,” residente sa maong barangay, human malampusong nakapalit ang police poseur-buyer og gituohang shabu nga nagkantidad og 500 pesos.
Gibutyag sa kapulisan nga kapin unom ka gramo sa gituohang shabu, nga adunay gibanabanang street value nga 26 mil 145 pesos, ang nasakmit atol sa operasyon, lakip ang 500 pesos nga buy-bust money.
Gipahigayon ang operasyon sa South Cotabato Provincial Police Drug Enforcement Unit, City Drug Enforcement Unit, Provincial Intelligence Unit ug First Provincial Mobile Force Company, uban ang koordinasyon sa Philippine Drug Enforcement Agency o PDEA.
Atubangon sa suspek ang kasong paglapas sa Sections 5 ug 11, Article Two sa Republic Act 9165 o Comprehensive Dangerous Drugs Act of 2002. Samtang, gipasalig ni Police Regional Office 12 Director PBGEN Alan Manibog nga magpadayon ang kampanya batok sa ilegal nga droga, subay sa balaod ug pagrespeto sa tawhanong katungod.
