Nasikop sa mga operatiba sa Police Station 9 sa General Santos City ang usa ka lalaki nga nalakip sa numero 7 nga most wanted person sa lebel sa siyudad, pinaagi sa pagpatuman sa warrant of arrest sa Barangay Labangal. Gipahigayon ang operasyon sa Tracker Team ug Intelligence Operatives sa Police Station 9 ubos sa pagdumala ni PMAJ Joseph William Y. Placer, station commander.
Ang gidakop nga suspek giila lamang sa alyas nga “Nat-Nat,” usa ka residente sa Barangay Labangal, nga giatubang ang kaso nga statutory rape ubos sa Article 266-A sa Revised Penal Code, nga giusab sa Republic Act 8353 ug Republic Act 11648.
Walay girekomendar nga piyansa alang sa maong kaso, sumala sa kapulisan. Human sa pagdakop, gipahibalo sa suspek ang iyang mga katungod subay sa balaod ug gibutang sa kustodiya sa Tanauan City Police Office samtang gihulat ang pagpagawas sa korte sa katugbang nga commitment order.
Gipasiugda sa kapulisan nga ang maong operasyon nagpakita sa koordinasyon sa nagkalainlaing yunit sa kapulisan aron masubay ug madakpan ang mga wanted person.
Photo courtesy: Police Station 9
