Patay ang usa ka 31-anyos nga babaye human miambak gikan sa taas nga andana sa Robinsons Place Dumaguete niadtong Martes, Oktubre 20, 2026. Sumala sa report, taga-Barangay Mangnao, Dumaguete City, ang biktima.
Gikumpirma ni Police Captain Stephen Jaynard Polinar sa Negros Oriental Police Provincial Office (NORPPO) ang insidente. Padayon pa ang imbestigasyon sa mga otoridad aron matino ang tinuod nga hinungdan ug mga kahimtang nga mitultol sa maong hitabo.
Sa opisyal nga pahayag sa Robinsons Dumaguete, diha-diha nga gitabangan sa Emergency Response Team sa mall ang kustomer, ug gipadali ang paghatag kaniya og medikal nga pag-atiman sa duol nga ospital.
Gipahayag usab sa mall ang ilang pakigduyog sa pamilya sa biktima ug ang pagtahod sa ilang pribasiya. Samtang, giawhag sa kapulisan ang publiko nga tahoron ang pribasiya sa pamilya ug likayan ang pagpakaylap sa dili kumpirmadong impormasyon. Giawhag usab ang tanan nga magpakita og pagsabot ug suporta sa mga tawo nga nag-atubang og emosyonal nga kalisod.
Photo courtesy: Negor Newsbite Today
