Naangol sa pagpamusil ang usa ka 38-anyos nga lalaki human gipusil sa wala mailhing suspek samtang naglakaw sa ngitngit nga eskinita sa Barangay Patun-an, Calatrava, Negros Occidental, alas 6:50 sa gabii niadtong Martes, Oktubre 20, 2026.
Ang biktima nga giila lamang sa ngalan nga Rusty, ulitawo ug residente sa maong barangay, gidala sa Calatrava District Hospital alang sa unang medikal nga pag-atiman sa Municipal Disaster Risk Reduction and Management Office (MDRRMO). Apan, tungod sa iyang samad pinusilan, gibalhin siya sa St. Anne Hospital sa Cadiz City alang sa dugang nga pagtambal.
Base sa inisyal nga imbestigasyon, gisundan ang biktima sa wala mailhing suspek sa dihang naglakaw siya gikan sa ilang pinuy-anan padulong sa main road. Sa dihang nakaabot sa usa ka lugar, gipusil siya sa makadaghang higayon sa suspek nga mikalagiw sakay sa pula nga Baja motorcycle padulong sa kabukiran sa Barangay San Benito.
Narekober sa crime scene ang duha ka basyo sa bala sa kalibre .45. Nagpadayon ang hot pursuit operation sa kapulisan aron mailhan ug madakpan ang suspek, samtang nakig-alayon usab sila sa kasikbit nga mga police station ug uban pang yunit alang sa posibleng dragnet operation.
Sa pagkakaron, wala pa matino ang motibo sa pagpamusil.
Photo courtesy: Vox
