Boluntaryong gitugyan sa usa ka sakop sa pamilya sa namatay nang retiradong miyembro sa Philippine Army ang nagkalainlaing armas, granada ug mga bala ngadto sa San Juan Municipal Police Station (MPS) sa Barangay Santa Cruz, San Juan, Southern Leyte niadtong Oktubre 23, 2026.
Sumala sa Police Regional Office 8 (PRO-8), ubos sa pagpangulo ni Regional Director PBGEN Romano V. Cardiño, nahimo ang maong pagtugyan pinaagi sa padayon nga koordinasyon ug pagbisita sa mga barangay sa mga personnel sa San Juan MPS.
Lakip sa mga gitugyan ang usa ka .38-caliber revolver, upat ka hand grenade, duha ka grenade launcher, 16 ka buhing bala sa M203 ug 20 ka buhing bala sa M16, lakip ang duha ka M16 magazine. Ang maong mga butang gitugyan ngadto sa estasyon sa kapulisan alang sa hustong pagdumala ug disposisyon.
Ang maong kalihokan resulta sa sunod-sunod nga pagbisita sa mga barangay diin giawhag sa kapulisan ang mga opisyal ug residente nga motaho o motugyan sa mga armas nga walay tukmang dokumentasyon ngadto sa mga otoridad. Tumong niini nga mapugngan ang posibleng paggamit sa maong mga armas ug bala sa ilegal nga kalihokan, ug mapalig-on ang kalinaw ug kaluwasan sa komunidad.
Photo courtesy: PRO 8
