Nakatala og dakong pag-usos sa gidaghanon sa mga kabus ang Amihanang Mindanao niadtong tuig 2025, sumala sa 2025 Full-Year Official Poverty Statistics sa Philippine Statistics Authority (PSA). Miusos ngadto sa 20.3 porsyento ang poverty incidence sa katawhan gikan sa 25.3 porsyento niadtong 2023, samtang ang poverty incidence sa mga pamilya miusos usab ngadto sa 14.4 porsyento gikan sa 18.4 porsyento.Gibana-banang 241,890 ka mga indibidwal ug 32,590 ka mga pamilya ang nahaw-as gikan sa katalaag.
Apan luyo sa dakong kalampusan, nagpabilin gihapon ang Amihanang Mindanao sa listahan sa tulo ka rehiyon nga may labing taas nga antas sa kapobrehon sa tibuok nasod. Gipasiugda ni DEPDev-X Regional Director Mylah Faye Aurora Cariño, ang kahinungdanon sa paghubad sa mga gipakitang paglambo sa ekonomiya ngadto sa tunhay ug mabati nga kaayohan sa matag panimalay, ilabina sa mga kabus ug vulnerable nga komunidad.
Dugang ni RD Cariño nga aron magpadayon ug mapadali ang pagkunhod sa kapobrehon, padayon sila sa pagpatuman sa Northern Mindanao Regional Development Plan 2023–2028 Midterm Update ug sa MAS ASENSO Agenda sa RDC-X. Kanunayng gitutokan sa mga plano ang pagmugna og panginabuhian ug trabaho, pagpauswag sa agrikultura, pagpalambo sa industriya ug turismo, ug ang pagpalig-on sa kapabilidad sa katawhan batok sa krisis sa ekonomiya ug pagbag-o sa klima aron masiguro nga ang mga benepisyo sa paglambo mabati ug makatabang sa tanan.
Photo courtesy: DepDev X/ PSA X
