Giawhag ni Bukidnon Provincial Medical Center (BPMC) Chief Dr. Miguel Antonio Prantilla ang mga pribadong ospital sa lalawigan nga makigtambayayong ug moapil sa paghatag og serbisyo sa mga kabus o indigent patients, ilabina pinaagi sa maayong referral system.
Gipasabot ni Prantilla nga bisan pa man kon adunay probisyon sa balaod nga nagtakda sa ilang bed capacity alang sa mga indigent ug sa mga pasyenteng sakop sa no-balance-billing policy, wala pa kini hingpit nga naipatuman sa pipila ka pribadong tambalanan.
Tungod sa maong sitwasyon, ang mga pampublikong ospital sa gobyerno nag-atubang ug kalisod tungod kay sa aktuwal nga kahimtang, kadaghanan sa ilang mga higdaanan nagamit na alang sa mga charity patients.
Gidugang pa ni Prantilla nga napugos na usab ang mga pampublikong ospital sa paggamit sa ilang mga contingency funds aron matabonan ang kakulang sa mga tambal ug medical supplies alang sa mga pasyente, hinungdan nga dako gayod ang tabang kon moapil ang pribadong sektor sa maong paningkamot.
Photo courtesy: BPMC – Malaybalay City
