Nagtanyag ang Department of the Interior and Local Government (DILG) og ₱50 milyones nga reward money alang sa makahatag og impormasyon nga makatabang sa pagdakop kang Senador Ronald “Bato” dela Rosa.
Sumala ni DILG Secretary Jonvic Remulla, giisip nga “armado ug peligroso” ang senador, ug ang maong kantidad kuhaon gikan sa intelligence funds sa DILG ug sa Philippine National Police (PNP). Gihatagan usab og ultimatum nga usa ka semana ang senador aron malinawong mosurender aron malikayan ang posibleng engkuwentro ug duguong pagdakop.
Ang maong aksyon may kalabotan sa arrest warrant nga giisyu sa International Criminal Court (ICC) bahin sa mga alegasyon sa crimes against humanity nga gihimo sa panahon sa kampanya batok sa ilegal nga droga sa administrasyon ni kanhing Presidente Rodrigo Duterte.
Si Dela Rosa ang nagsilbing hepe sa PNP sa maong panahon, ug ang mga awtoridad naghimo na karon og espesyal nga task force aron pagpangita ug pagdakop kaniya kon magpadayon kini sa pagtago.
Photo courtesy:wikipedia
