Gipangunahan sa mga lumulupyo ug lider sa Indigenous Cultural Communities sa San Fernando, Bukidnon ang malampusong pagselebrar sa Sabit Festival niadtong nakalabay nga adlaw. Gipakita sa maong kalihokan ang buhi nga kultura ug tradisyon sa mga tribong Tigwahanon ug Matigsalug pinaagi sa nagkalain-laing pasundayag ug panagtapok.
Gipasiugda ni Municipal Mayor Rogelio Yeke sa maong okasyon ang importansya sa edukasyon ug pagpalambo sa mga kabatan-onan sa lugar, diin gihisgutan nga gipundohan ang mga eskwelahan sa nagkalain-laing sityo ug barangay aron masiguro nga makabaton og maayong kaugmaon ang mga kabataan
Nagpasalamat ang lokal nga panggamhanan ug mga lider sa tribo sa hugot nga suporta sa mga ahensya ug sa administrasyon sa pagpalig-on sa ilang kultura. Gipasabot niini nga ang kultura dili lamang pamaagi sa kagahapon, kondili usa ka mahinungdanong bahandi nga kinahanglan ipasa ngadto sa mosunod nga mga henerasyon.
Kahibaloang ang Sabit Festival (nailhan usab nga Savit Nu Kalibulongan) usa ka tinuig nga selebrasyon sa pagpasalamat alang sa abundang ani sa mga lumad nga sakop sa Manobo indigenous cultural communities sa lungsod sa San Fernando
Photo courtesy: Municipality of San Fernando
