Nakighiusa si Bise Presidente Sara Duterte sa pagsaulog sa ika-69 nga anibersaryo ug kapistahan sa lungsod sa Pangantucan, Bukidnon niadtong Oktubre 23, 2026.
Mismo ang Bise Presidente ang nitambong sa maong kalihokan isip dinapit nga bisita aron personal nga makigduyog ug makig-uban sa mga lokal nga opisyal ug mga lomolupyo sa ilang importante ug makasaysayanong pagsaulog. Mainiton ug malipayong gihangop sa mga residente ug mga opisyal sa lungsod, sa pagpanguna ni Municipal Mayor Manulito Garces, ang pagbisita ni Duterte nga nagpakita sa iyang padayong pagtagad ug pagpaluyo sa mga komunidad sa Mindanao.
Aron masiguro ang hapsay ug luwas nga pagpahigayon sa maong okasyon, nagpatuman ang kapulisan sa Bukidnon og hugot nga mga lakang sa seguridad sa tibuok gidugayon sa pagbisita sa bise presidente. Mismo si PCol. Oliver S. Navales, ang direktor sa PNP-Bukidnon, maoy nanguna sa maong security operations uban sa iyang mga personahe sa kapulisan aron mapanalipdan ang kaluwasan sa tanang nitambong.
Ang malampusong pagduyog ni VP Sara Duterte sa Pangantucan nagpakita dili lamang sa kaimportante sa ika-69 nga anibersaryo sa lungsod, apan nagpatin-aw usab sa lig-on nga pagtambayayong sa lokal nga gobyerno, sa kapulisan, ug sa nasudnong panggamhanan alang sa kalambuan ug seguridad sa probinsya sa Bukidnon.
Photo courtesy: OVP
