Nanawagan si ACT Teachers Party-list Representative Antonio Tinio sa House of Representatives nga ibalik gikan sa Senado ang gisugyot nga 2027 national budget aron matul-id ang mga probisyon nga posibleng supak sa Konstitusyon. Matod ni Tinio, kinahanglan nga ayohon sa Kamara ang mga kuwestiyonableng probisyon sa ilang giaprobahang bersiyon sa badyet, subay sa bag-ong desisyon sa Korte Suprema.
Lakip sa iyang gikuwestiyon ang mga kondisyon sa pagpagawas sa unprogrammed appropriations, pagkunhod sa pondo alang sa mga proyektong gisuportahan sa langyaw nga mga institusyon, ug mga pundo nga walay klarong gitakdang paggastohan, lakip ang pinansyal nga tabang alang sa mga lokal nga pangagamhanan. Matod niya, kinahanglan kining susihon ug tul-iron aron malikayan ang pag-aprobar sa badyet nga mahimong ideklarang supak sa Konstitusyon.
Gipasiugda usab ni Tinio ang pagpanubag sa mga opisyal nga nalambigit sa paghimo ug pagpatuman sa mga probisyon nga supak sa Konstitusyon. Sumala sa Korte Suprema, ang mga responsable mahimong moatubang sa sibil, kriminal o administratibong tulubagon, gawas kon mapamatud-ang milihok sila nga may maayong pagtuo. Sa laing bahin, nagpahayag si Senate Finance Committee Chair JV Ejercito og kabalaka nga ang pagpabalik sa badyet mahimong makaapekto sa iskedyul sa lehislatibong proseso.
Photo courtesy: Wikipedia
