Ang kusog nga pagtubo sa artificial intelligence o AI nahimong usa sa mga nagpalihok sa kalamboan sa ekonomiya sa kalibutan. Apan nagpasidaan ang mga eksperto ug mga magbabalaod sa ekonomiya nga mahimong adunay dakong epekto kung mohinay o mokunhod ang pamuhunan sa maong teknolohiya.
Sumala sa International Monetary Fund o IMF, nakatabang ang dakong paggasto sa mga data center ug microchip aron mamenosan ang epekto sa pagsaka sa presyo sa enerhiya sa tibuok kalibutan tungod sa gubat sa Middle East. Matod usab sa IMF chief economist nga si Silvana Tenreyro, misaka og 8.3 porsiyento ang global trade gikan sa 2023 hangtod 2025, ug mahimong anaa lamang sa 4.6 porsiyento kon walay mga produkto nga may kalabotan sa AI.
Gipasabot usab ni Bank of Canada Governor Tiff Macklem nga makita na ang impluwensiya sa AI sa gross domestic product o GDP, stock market ug bond market. Bisan pa niini, si Federal Reserve Chair Kevin Warsh mipahimangno nga mahimong dili hapsay ang pag-uswag sa teknolohiya tungod sa kawalay kasigurohan sa umaabot nga merkado ug sa direksiyon sa AI.
Samtang, si IMF Managing Director Kristalina Georgieva mipasiugda nga kon mokunhod ang pagsalig sa mga mamumuhunan ug ilang kuhaon ang ilang kuwarta gikan sa AI industry, mahimong mameligro ang kalig-on sa pinansyal nga sistema. Sa taho sa IMF, gibanabana nga ang pagkunhod sa pamuhunan sa AI mahimong mopakunhod sa global GDP og 0.4 porsiyento sa tuig 2028.
Photo courtesy: SAPeople
