Gikumpirma sa gobyerno sa France kagahapon Huwebes, Oktubre 22, ang natala nga pinakaunang kaso ug kamatayon sa usa ka tawo tungod sa Shamonda virus. Ang maong pathogen usa ka matang sa virus nga kasagarang makatakod lamang sa mga mananap sama sa mga baka, apan mao pa kini ang labing unang higayon nga adunay tawo nga natakdan sa maong sakit.
Nagtuo ang mga awtoridad sa maong nasod nga napasa ang virus ngadto sa biktima pinaagi sa pahit sa usa ka insekto nga nagdala sa maong impeksyon gikan sa mga mananap. Dugang sab sa paspas nga pagtakod niini sa maong pasyente kinsa nag-atubang na daan ug nagpaayo gikan sa usa seryosong sakit, hinungdan nga mas dali nga mipatugbaw ug mikaylap ang impeksyon sa iyang lawas.
Bisan pa man og gipadayag sa lokal nga pamahalaan nga sayo pa kaayo aron konsiderahon kini nga dako nga hulga sa kaluwasan sa publiko, nagpadayon gihapon ang pag-monitor sa mga eksperto gikan sa European Centre for Disease Prevention and Control (ECDC) ug nakig-alayon sa mga awtoridad sa France aron masusi pag-ayo ang epekto ug posibleng implikasyon sa maong insidente sa pampublikong kahimsog.
Photo courtesy: IG
