Gipangita sa Davao City Police Office (DCPO) ang duha ka suspek sa sunod-sunod nga armadong pagpangawat sa Matina, Davao City, niadtong Oktubre 6, 2026. Nagtanyag ang kapulisan og ₱500,000 nga ganti alang sa impormasyon nga makatabang sa pag-ila ug pagdakop kanila.
Base sa imbestigasyon, unang gitulis sa mga suspek ang usa ka babayeng estudyante ug gikuha ang iyang bag nga adunay ₱2,000 nga kwarta ug personal nga mga gamit.
Sunod, miadto ang mga suspek sa usa ka talyer sa motorsiklo diin gipusil ang tag-iya atol sa pakigbisog, hinungdan nga naigo ang iyang bukton. Gitulis usab nila ang usa ka minimart ug nakakuha og laing ₱2,000.
Padayon ang pagsusi sa CCTV footage aron mailhan ang mga suspek nga gituohang nagsakay og Honda Click nga motorsiklo. Giawhag sa DCPO ang publiko nga motabang sa imbestigasyon ug likayan ang pagpakaylap sa mga hulagway nga hinimo pinaagi sa artificial intelligence kun AI.
Photo courtesy: DCPO
