Nasikop sa kapulisan ang 26-anyos nga lalaki human giingong nangdunggab sa usa ka 26-anyos nga motorcycle driver sa Purok 2, Barangay Dulop, Dumingag, Zamboanga del Sur, niadtong nakalabay nga adlaw.
Base sa inisyal nga imbestigasyon sa Dumingag Municipal Police Station, nasayran nagtan-aw og dula sa bilyaran ang biktima sulod sa usa ka billiard house, dihang kalit siyang gidunggab sa suspek sa ubos nga bahin sa tuo niyang dughan, sa walay igong hinungdan.
Daling gitabang sa mga residente ang biktima ug gidala sa Dumingag Rural Health Unit, apan gi-transfer kini ngadto sa hospital sa Ozamiz City alang sa dugang pagtambal.
Human sa krimen, gilusad sa Dumingag PNP ug 1st Zamboanga del Sur Provincial Mobile Force Company ang hot pursuit operation nga miresulta sa pagkasikop sa suspek sa maong lugar.
Narekober gikan sa suspek ang usa ka plamingko nga kutsilyo nga gigamit sa krimen kinsa gikustudiya na sa Dumingag Municipal Police Station alang tukmang pagpasaka og kaso.
Photo courtesy: ZSPPO-PIO
