Boluntaryong misurender ang usa ka kanhi regular nga miyembro sa New People’s Army (NPA) nga giila sa alyas nga “Tino,” usa ka mag-uuma ug residente sa Barangay Maligaya, Mahaplag sa didto sa Barangay Liberacion, Mahaplag, Leyte, niadtong nakalabay nga adlaw.
Ang pagsurender gipadali sa 1st Leyte Provincial Mobile Force Company sa Leyte Police Provincial Office (LPPO), ubos sa pagpangulo ni PCOL Celerino M. Sacro Jr., pinaagi sa koordinasyon sa nagkadaiyang yunit sa kapulisan.
Sumala sa kapulisan, kanhi siyang full-time combatant ug miyembro sa Intelligence Committee sa Leyte-Visayas Operations (IC-LEVOX) sa Eastern Visayas Regional Party Committee (EVRPC). Iyang gipahayag ang tinguha nga mobiya na sa maong kalihukan ug mobalik sa malinawon ug normal nga kinabuhi.
Atol sa pagsurender, iyang boluntaryong gitugyan ang usa ka .38 caliber revolver ug duha ka buhing bala sa atubangan sa barangay captain sa Barangay Liberacion. Ang armas ug bala gidokumento ug anaa na sa kustodiya sa kapulisan. Human sa inisyal nga dokumentasyon ug intelligence debriefing, nakadawat usab ang misurender og pinansyal nga tabang ug gipapauli.
Photo courtesy: PNP LPPO
