Napuhag sa Philippine Drug Enforcement Agency o PDEA Region 12 ang usa ka giingong drug den sa Barangay San Isidro, General Santos City, diin tulo ka indibidwal ang gidakop ug kapin P106,000 nga kantidad sa gituohang shabu ang nasakmit.
Gipahigayon ang operasyon niadtong Oktubre 21, 2026, sa Lacap Subdivision, Purok Lower Malakas, sa maong barangay, pinaagi sa PDEA Region 12, ilawom sa Sarangani–General Santos Provincial Office, sa koordinasyon sa General Santos City Police Office–Police Station 4.
Giila ang mga nadakpan sa alyas nga “Jr,” 37 anyos, nga giingong tigmentinar sa drug den; “Dondon,” 26 anyos, nga gikatahong bisita sa maong lugar; ug “Jak,” 26 anyos, nga giingong empleyado sa drug den.
Narekober sa mga otoridad ang pito ka heat-sealed plastic sachet nga gituohang shabu, nga may standard drug value nga 106,760 pesos. Nasakmit usab ang usa ka tinuod nga 1,000-peso bill, duha ka cellphone ug nagkalainlaing drug paraphernalia.
Atubangon sa tulo ang mga kasong may kalabotan sa paglapas sa Article II sa Republic Act 9165 o Comprehensive Dangerous Drugs Act of 2002.
Matud sa PDEA Region 12, magpadayon ang ilang koordinasyon sa kapulisan ug uban pang ahensiya aron mabungkag ang mga drug den, mapugngan ang ilegal nga patigayon sa droga ug mapanalipdan ang kaluwasan sa mga komunidad.
Photo courtesy: PDEA 12
