Boluntaryong mitahan sa Koronadal City Police Station ang usa ka Sangguniang Kabataan o SK Chairman sa South Cotabato human kini nalambigit sa giingong pot session sa gidiling droga niadtong milabayng mga adlaw.
Matud ni Police Lieutenant Colonel Harold Cornel, hepe sa Koronadal City Police Station, gipailalom dayon ang maong SK official sa checking, profiling, booking, debriefing ug drug testing aron matino ang angay nga sunod nga lakang batok kaniya.
Gidugang ni Cornel nga posibleng ipailalom ang maong opisyal sa Community-Based Drug Rehabilitation Program o CBRP, depende sa resulta sa drug test ug sa assessment sa mga personahe sa Anti-Drug Council.
Giklaro usab sa hepe nga dili pasabot nga pinaagi sa rehabilitation program awtomatikong makalikay na sa pag-aresto o kasong kriminal ang usa ka indibidwal. Mahimo gihapon siyang manubag ubos sa Republic Act 9165 o Comprehensive Dangerous Drugs Act of 2002, ilabi na sa Section 15, depende sa resulta sa imbestigasyon ug sa mga ebidensiyang makuha batok kaniya.
Samtang, mahimo usab nga mag-atubang og administratibong kaso ang usa ka opisyal sa gobyerno kon mapamatud-an ang iyang kalambigitan sa maong kalihokan, subay sa resulta sa gihimong imbestigasyon.
Padayon usab ang Koronadal City Police sa pagpalig-on sa kampanya batok sa ilegal nga droga pinaagi sa mga lecture, information drive ug uban pang preventive programs sa mga barangay ug tunghaan.
Photo courtesy: Koronadal CPS
