Giimbestigahan sa Iligan City Police Station 5 (ICPS5) ubos sa pagpanguna ni PMAJ Reagan Adap, ang viral nga post sa social media kalabot sa giingong wala gitugot nga pagpangayo og donasyon gikan sa mga lumalabay duol sa usa ka lokal nga mall sa dakbayan sa Iligan.
Nagsugod ang maong imbestigasyon human sa post niadtong Oktubre 20, 2026, sa Facebook group diin gipasidan-an ang publiko batok sa usa ka indibidwal nga giingong nagduol sa mga lumalabay sa pig-ot nga agianan duol sa sapa nga nagkonektar gikan sa Gaisano Mall paingon sa One Stop Shop.
Matud sa maong post, nagtanyag kini og mga hulagway ni Hesus ug sa Balaang Pamilya, nangayo sa mga ngalan alang sa kunohay misa o pag-ampo alang sa mga namatay nang kabanay, ug dayon nangayo og boluntaryong donasyon nga kuwarta.
Nakig-coordinate ang kapulisan sa St. Michael’s Cathedral Archdiocese ug nasayran nga ang mga representante sa katedral ug ubang mga parokya sa Iligan midumili nga naghatag sila og pagtugot sa bisan kinsang indibidwal nga mangayo og donasyon pinaagi sa maong pamaagi, ilabina ang paghatag og relihiyosong mga hulagway o sobre baylo sa kuwarta ug saad nga iampo ang mga namatay nang sakop sa pamilya.
Tungod niini, giawhag sa ICPS5 ang publiko nga magmabinantayon batok sa mga kadudahang pagpangayo og donasyon ug ireport dayon sa pinakaduol nga estasyon sa kapulisan ang susamang mga kalihokan.
