Bulan pa lang sa Hulyo, nagpagawas na og kamanduan ang Departamento sa Edukasyon (DepEd) alang sa pagpangandam sa posibleng grabeng epekto sa El Niño sa mga tunghaan. Sumala ni DepEd Cagayan de Oro Division Spokesperson Romeo Aclon, lakip sa ilang ginasusi ang mga linya sa tubo sa tubig aron masiguro nga walay mausik ug magpadayon ang suplay niini sulod sa tunghaan sa panahon sa ting-init.
Apil na usab niini ang pagtan-aw sa mga water impounding system ug pagbutang og mga water tank. Dugang pa ni Aclo, daan nang may kamanduan ang DepEd nga kung moabot na sa dili luwas nga lebel ang kainit sa panahon, kinahanglan nang magpatuman og suspensyon sa klase ang mga tunghaan alang sa kaluwasan dili lang sa mga estudyante kon dili lakip na sa mga empleyado ug maestra.
Apan gipasalig sa opisyal nga dili gihapon maputol ang pagtuon sa mga bata tungod kay ipatuman man ang alternative delivery mode sama sa online classes ug modular learning.
Photo courtesy: DepEd Tayo Cagayan de Oro City
