Padayon nga gipangita aron nga makigsulti ang Barangay Council sa Barra, Opol sa mga estudyanteng nalambigit sa pagdala og pistola sulod sa Barra Elementary School, lakip ang ilang mga ginikanan.
Sumala kang Kagawad Manny Bersabal, usa ka Grade 3 pupil ang misumbong sa iyang teacher nga adunay pistola sa iyang bag, nga giingong gikan sa iyang amigo nga Grade 7 student. Gidudahang tuyo nilang gamiton kini aron manimalos sa ilang kaaway nga kaeskwela.
Dali nga gipangita sa mga otoridad ang mga nalambigit ug nakuha ang armas nga usa ka caliber .22 Magnum.
Giklaro sa mga otoridad nga walay estudyanteng nasamdan ug wala usab mobuto ang armas. Padayon ang pagpaningkamot nga makig-estorya sa mga bata ug sa ilang mga ginikanan.
