Mikunhod ang bag-ong mga kaso sa leptospirosis ug dengue, base sa pinakabag-ong datos sa Department of Health (DOH). Base sa report, mikabat sa 1,159 ang kaso sa leptospirosis gikan sa Septiyembre 17 hangtod 30, nga 55 porsiyentong ubos kumpara sa miaging duha ka semana.
Apan, misaka na sa 13,530 ang kinatibuk-ang kaso karong tuiga, o 47 porsiyentong mas taas kumpara sa samang panahon niadtong 2025. Sa dengue, mikabat na sa 205,347 ang kinatibuk-ang kaso, nga 22 porsiyentong ubos kaysa sa niaging tuig.
Padayon usab nga gibantayan ang lokal nga pagsaka sa kaso sa 11 ka probinsya ug highly urbanized city sa siyam ka rehiyon. Nagpahimangno usab ang DOH sa publiko nga iyabo ang mga natigom nga tubig nga mahimong itlogan sa lamok, likayan ang paglusong sa baha, ug magpakonsulta dayon kon adunay sintomas o human maladlad sa tubig-baha.
Photo courtesy:Department of Health
