Nadakpan sa kapulisan ang Top 5 Most Wanted Persons sa probinsya sa Southern Leyte tungod sa kasong murder atol sa Manhunt Charlie Operation niadtong Oktubre 20, 2026, sa Barangay Pio del Pilar, Makati City.
Ang nadakpan mao ang 56-anyos nga minyo nga lalaki nga nagtrabaho isip laborer ug residente sa maong barangay. Ang operasyon gipahigayon sa mga personahe sa Malitbog Municipal Police Station pinasikad sa warrant of arrest nga gi-isyu niadtong Hulyo 8, 2002, sa Presiding Judge sa Regional Trial Court (RTC) Branch 25 sa Maasin City, Southern Leyte, ubos sa Criminal Case No. 2351. Walay piyansa nga girekomenda alang sa maong kaso.
Human sa pagdakop, gidala ang akusado sa Makati City Central Police Station alang sa hustong disposisyon samtang gihulat ang iyang turnover ngadto sa korte nga nag-isyu sa warrant. Ang operasyon kabahin sa gipakusgang kampanya sa Southern Leyte Police Provincial Office (SLPPO), ubos sa pagpangulo ni PCOL Emmanuel P. Caquilala, Officer-in-Charge, batok sa mga wanted nga indibidwal.
Photo courtesy: SLPPO
