Nadakpan ang usa ka giila nga High-Value Individual (HVI) sa Regional Priority Target List (RPTL) atol sa buy-bust operation nga gipahigayon sa hiniusang pwersa sa kapulisan sa Barangay Poblacion, Liloan, Southern Leyte, pasado alas 6:41 sa gabii niadtong nakalabay nga adlaw.
Ang suspetsado nga giila sa alyas “Vincent,” 33 anyos, ulitawo ug residente sa maong barangay, nadakpan sa operasyon nga gipangulohan sa Southern Leyte Provincial Drug Enforcement Unit (SLPDEU), ubos sa pagdumala ni PLT Candelario G. Dalogdogan Jr., isip lead unit, kauban ang Liloan Municipal Police Station (MPS) ug Southern Leyte Maritime Police Station, nga gipangulohan ni PSSg Pablito A. Umbana. Gihimo ang operasyon ubos sa koordinasyon sa Philippine Drug Enforcement Agency (PDEA), nga adunay Coordination and Control No. 9-00-10192026-017.
Atol sa operasyon, nakumpiskar ang upat ka gagmayng transparent plastic sachet nga adunay gidudahang shabu, diin duha niini nga gibana-banang motimbang og 1.2 gramos ang giingong subject sa baligya, samtang ang laing duha nga may gibana-banang 1.0 gramos giingong iya sa suspetsado.
Giandam ang pagpasaka og kaso batok sa suspetsado tungod sa giingong paglapas sa Section 5 (Sale of Dangerous Drugs) ug Section 11 (Possession of Dangerous Drugs), Article II sa Republic Act No. 9165 o Comprehensive Dangerous Drugs Act of 2002.
Photo courtesy: SLPPO
